Мемлекет Басшысы Қасым-Жомарт Тоқаев өзінің халыққа Жолдауларында елімізде саламатты өмір салтын насихаттау және балалар мен жасөспірімдер спортын дамытудың маңызды бағытын белгіледі. «Астана» ФК осы Жолдауды басшылыққа алады және балалар футболын жақсартуға көп көңіл бөледі: клуб Қазақстан Республикасы Білім және ғылым министрлігі жанындағы Ұлттық ғылыми-практикалық дене шынықтыру орталығымен ынтымақтастықты бастайды. 

Бұл ынтымақтастық балаларды футбол орталығында дайындауға жаңаша көзқараспен қарауға, дұрыс тамақтану жүйесінің жаңа деңгейіне шығуға және медициналық штабтың жұмысын жетілдіруге мүмкіндік береді. «Астана» «2025» даму стратегиясын әзірлеуде, онда футбол орталығында балалардың оқу-жаттығу сабақтары үшін инфрақұрылымды жақсартуға баса назар аударылады.

Клуб кеңсесінде Ұлттық ғылыми-практикалық орталық басшылығы, жаттықтырушылар құрамы мен өкілдері – медицина ғылымдарының докторлары Эмиль Мухамеджанов пен Владимир Цицуриннің кездесуі өтті. 

Кездесудің басты мақсаты – футбол орталығының жанынан ғылыми-зерттеу орталығын ашу, клуб тәрбиеленушілерінің жұмысқа қабілеттілігін арттыру үшін арнайы тамақтану бағдарламасын әзірлеу және ойыншылардың функционалдық жағдайын диагностикалау. Осы бағдарламаның және арнайы жабдықтың көмегімен футбол орталығының медициналық штабымен бірлесіп, жас футболшылармен жұмыс істеудің жаңа әдістерін енгізу жоспарлануда. 

Бағдарлама туралы толығырақ клубтың баспасөз қызметіне «Астана» футбол орталығының спорт дәрігері Азамат Нұрмаханов айтып берді: Маман Мәскеу Ұлттық заманауи технологиялар академиясында «Емдік дене шынықтыру және спорттық медицина» мамандығы бойынша оқыды және Дүниежүзілік допингке қарсы агенттіктің халықаралық сертификатына ие:

– Біздің футбол орталығында әрдайым ойыншылардың денсаулығын қалай бақылау керек деген сұрақ тұрды. Бүгінгі таңға дейін бізде спортшының функционалды жағдайын көрсететін қажетті жабдық болған жоқ. Иә, біз жыл сайын терең медициналық тексеру өткіземіз, бірақ ойыншының денсаулығын спортшы емес, қарапайым адам ретінде тексереміз. Енді алда бізге футболшының организмі физикалық белсенділікке қаншалықты дайын екенін және жыл бойы олармен қалай күресетінін түсінуге арналған арнайы жабдық ұсынылады. Бұл құрылғының жұмыс принципі жүрек ырғағының өзгергіштігін зерттеуге негізделген. Жүрек-тамыр жүйесінің жұмысы арқылы біз бүкіл ағзаның жұмысын бақылай аламыз, атап айтқанда: симпатикалық және парасимпатикалық жүйке жүйесі, нейро-эндокриндік жүйе және басқалар. Жыл бойына футболшылардың функционалды жағдайы туралы мәліметтермен біз оның денсаулығы мен жаттығу жүктемесінің қарқындылығына толық бақылау жасай аламыз. Ғылыми орталықтың тәжірибелі профессорлары Эмиль Мухамеджанов және Владимир Цицуринмен бірлесіп жұмыс жасай отырып, біз әртүрлі жастағы футболшылардың жаттығу жүктемелері туралы мәселеге егжей-тегжейлі қарай аламыз. Өздеріңіз білетіндей, қазіргі әлемде футболшылардың денсаулығына төнетін қауіптер бар, оны біз Еуропаның соңғы чемпионатынан байқадық. Осы тәжірибенің арқасында «Астана» футбол клубы біздің балаларымыздың денсаулығы үшін тәуекелдерді барынша азайта алады.