– Ойын алдында көп айтылды: ұзақ үзілістен кейін бірден ойынға қосылу өте маңызды. Бірақ алғашқы 20 минутта ұлттық құрамалар ойыншылары алаңға шықпады. Білмеймін, бәлкім біреу тартысқа толы кездесу күтті, бірақ мен оны қаламадым. 26-шы минутта 0:2 есебімен жеңіліп жаттық. Ол голдарда шешуші жағдай – сәттілік серік болды. Бірақ алғашқы 15 минуттағы ойынымыз өте нашар болды. Бақытымызға орай, ойынды қайта қолға алдық, керемет он минуттық болды — өте қиын әрі әдемі голдар соқтық. Бірінші таймда-ақ ойынды өз қолымызға алдық. Екінші таймды жақсы бастадық, төртінші голды соқтық, бірақ содан кейін тағы да футбол ойнауды қойдық. Қарсыласта 2-3 мүмкіндік болды — бұлай ойнауға болмайды. Тактиканы өзгертуге тура келді: флангтарды жауып, 3-4-3 схемасына көштік, соңында бесінші голды соғып, ойынды тыныштандырдық. Жеңіске жеткеніміз жақсы. Бұл турнирлік жағынан маңызды, өйткені қарсыластарымыз ұпай жоғалтты. Команданы және жанкүйерлерді жеңіспен құттықтағым келеді. Көрермен үшін қызықты матч болды, бірақ жаттықтырушылар штабы үшін алғашқы 20 минут өте нашар өтті.

– 20-шы минутқа дейін доп негізінен қорғаушылар арасында жүріп жатты. Ал 0:2 есебінен кейін Грипши мен Аманович қозғалысқа түсті. Бұның себебі қандай? Неге олар сол уақыт аралығында ойыннан шығып қалды?
– Нақты айту қиын. Үзіліске дейін бізде жоспар болды, тіпті 0:2 есебімен видео дайындадық. Бірақ біз сол сәттегі қателіктерімізді бірден түзеттік. Доппен дұрыс ойнауды бастаған кезде бос кеңістіктер пайда болды. Алғашқы 15–20 минутта сол қанат мүлде жұмыс істемеді, ешқандай белсенділік болған жоқ. Бірақ 20-шы минуттан кейін белсенділік артты. Егер сен орталықпен де, қанаттармен де ойнай алсаң, қандай да бір команда қаншалықты терең ойнаса да, оған қарсы тұру қиын болады. Томасовты да ерекше атап өткім келеді. Ол 4 голға қатысып, нағыз кәсіби ойын көрсетті. Тек біздің команда үшін емес, бүкіл чемпионат үшін үлгі боларлық ойыншы. 38 жасында осындай көлемде жұмыс атқарып, осындай деңгейде өнер көрсету – үлкен жетістік. Бүгін ол нағыз көшбасшы болды.

– «Астана» қазіргі таңда бірінші орында. Өткен аптада қаржылық мәселе шешілді. Енді командаға не кедергі келтіруі мүмкін?
– Мұнда Қор басшылығына алғыс айту керек. Олар біздің мәселелерімізді шешіп жатыр. Әлі барлық мәселе шешілген жоқ, бірақ шешілу үстінде. Бұл – жақсы белгі. Қор жетекшілеріне, клуб басшыларына алғысымыз шексіз. Олар біз үшін уайымдап, қолдан келгеннің бәрін жасауда. Бірақ қазір турнир кестесіне қараудың мәні жоқ. Келесі матч – Ақтөбеде, ол өте ауыр ойын болады. Әр матчта бар күшімізді салып ойнауымыз керек және бүгінгі кеткен қателіктерді қайталамауымыз қажет. Қорғанысқа ерекше назар аудару керек, себебі бүгін қарсыласқа көп мүмкіндік бердік. Дегенмен біз де 15-ке жуық соққы жасадық.

– Команда неге кей сәттерде ойынан шығып қалып жатады? Бүгінгі матчта да сондай болды.
– Бүгін тепе-теңдік болмады. Вороговский мен Кипрас сияқты құрамадан келген ойыншылар ұзақ уақыт бірге жаттықпаған. Коммуникация жетіспеді. Мұны сылтау қылуға болады, бірақ теориялық дайындық кезінде біз нақты қателіктерді анық көрдік. Бұл қателіктерді қайталауға болмайды. Команда өз қателіктерінен сабақ алмаса, бұл – үлкен мәселе. Біз бұл жайлы үнемі айтып келеміз. Бірақ көріп отырсыздар, қайта-қайта айтсақ та, біреуі ойыннан шығып қалады. Сол кезде басқа ойыншыға мүмкіндік беріледі. Әр футболшыға 3–4 матч мүмкіндік береміз. Егер дайын болмаса — келесі адам ойнайды. Кім тапсырманы орындайды — сол алаңға шығады. Бұл — жеңіске жетуді көздеген команда үшін маңызды нәрсе.

– Бұл Чинеду жайлы ма?
– Чинеду гол соқпады, ал Кәрімов гол соқты. Айта кету керек, алаңға шыққан барлық ойыншылар жақсы ойнады. Чинеду әуедегі доптарға жақсы таласты, жеңіп те жүрді. Басманов гол соқты, Эльхан да гол соғуға лайықты ойнады, үлкен ынта-жігер көрсетті. Арман Кеңесов тірек аймағына жақсы қосылды, Абзал да доптарды жақсы іліп алып отырды. Мен барлық матчта осылай қосылып, команданы күшейткенін қалаймын. Бұл – ауыстырулар туралы.

– Еурокубоктар алдында команданы күшейту жоспары бар ма? Бәсекелестер де күшейетіні анық қой.
– Бізде бұл жоспар қыста да болған. Сол кезде екі позицияны күшейтуді ойлағанбыз. Қазір де солай. Бірақ бәрі қаржыға келіп тіреледі. Оның қаншалықты мүмкін екенін білмеймін. Алда ауыр ойындар, Конференциялар лигасы бар. Ол жаққа қалай баратынымыз белгісіз — чартермен бе, әлде тұрақты рейспен бе. Үшінші күннен төртінші күнге ойнау – қиын. Қазір бізде дайын нұсқалар бар, бірақ бәрі тағы да қаржыға байланысты. Қазір бірнеше футболшыны бірден алу мүмкін емес. Бірақ Еуропада табысты өнер көрсету үшін ең кемінде екі позицияны күшейту керек.

– Қандай позициялар жайлы айтып отырсыз?
– Біреуін айта аламын — артта ойнайтын жартылай қорғаушы іздеп жатырмыз. Бұл – қазір бізге қажет позиция. Екіншісі туралы әзірге айтпаймын.

– Қосалқы құрам ойыншылар керек екені анық. Ал клубтан кететіндер бола ма?
– Егер біреу кетеді десек, алдымен біреуді алуымыз керек. Қазір барлық ойыншыны таратып, біреуді аламыз деп үміттенуге болмайды. Бірақ егер 1–2 ойыншыны алатын болсақ, сонша адамды шығарамыз.

– Кеңесов пен Аханону туралы ақпарат әзірше шындыққа сәйкес келмей ме?
– Әзірге жоқ.

«Астана» футбол клубының бас серіктесі – «Самұрық Қазына» ӘАҚ» АҚ

«Астана» футбол клубының серіктесі – «Туризм және спорт индустриясын қолдау қоры» КҚ